Nişan
üzüyünə sabunun dolmasından ötrü darıxmaqdır tənhalıq
Tənhalıq sevgi məktubundan düzəltdiyin
gəmidir
Tənhalıq mobil operator mesajları
Tənhalıq sevginin ateizmidir
Sual işarəsiylə toplanan adındır tənhalıq
Çobanyastığı falında sevgisini
itirmiş
dul qadındır tənhalıq
Tənhalıq çətirin altındakı birnəfərlik boş yerə "sərnişin" dilənməkdir
Çaydanın buxarında kişi hənirtisi axtarmaqdır tənhalıq
Gecələr yastığına qadın ətri vurub yatmaqdır tənhalıq
Tənhalıq sığınmağa otağın künc-qucağıdır
Tənhalıq bədbəxtliyin kar qarşılığıdır
Tənhalıq otaqlardan uzaqlara var-gəl etməkdən
Varlığını və gələcəyini unutmaqdır
Dayanıb bir binanın damından
ömrü itələyib yerə
atmaqdır
Tənhalıq tək yatmağa
ikinəfərlik yataqlardır…
ikinəfərlik adamlardır
QAN ANALİZİ
( 9 yaşlı Naziləyə rekviem)
Bir qızcığazı pozğuncasına
aldatmışdılar
"Barmağını ver, analiz götürürük"deyib
Üz-gözünə əlvan boya,
adına isə qara ləkə yaxmışdılar
Gəlin havası çalınanda havası çatmamışdı
Yəni, toy günü ona toy tutmuşdular
Nəhayət, 63 yaşlı əri
ondan qan analizi
götürmüşdü
barmağından deyil,
bəkarətini pozaraq bətnindən...
Blogger ŞƏRHLƏRİ
Facebook ŞƏRHLƏRİ