Elnarə NUR 1994-cü ildə Tovuzda doğulub.Hazırda Azərbaycan Müəllimlər İnstitutu Gəncə filialının tələbəsidir.
Şeirləri Azərbaycan türkcəsindən Türkiyə türkcəsinə tərcümə olunub.Dövri mətbuat səhifələrində şeirləri müntəzəm olaraq dərc olunur.
2012-ci ildə Azərbaycan Respublikası Gənclər-İdman Nazirliyi tərəfindən maliyyələşdirlilən və Dünya Gənc Türk Yazarlar Birliyi tərəfindən həyata keçirilən ”Bölgələrdə yaşayan yaradıcı gənclərlə görüşlər” layihəsi çərçivəsində “Bölgələrdən səslər” kitabında şeirləri dərc olunaraq ilk dəfə olaraq Respublika səviyyəsində ictiamiyyətin nəzərinə çatdırıldı.
2013-cü ildən Azərbaycanın Mədəniyyət və Ədəbiyyat Portalının Fəxri üzvüdür.Dünya Gənc Türk Yazarlar Birliyinin və "Gənc Ədiblər Məktəbinin" üzvüdür.
Sözün yolçusuyam mən
Nə şaxtanın, nə boranın
Nə xoş keçən bircə anın
Nə böhtanın, nə yalanın
Düzün yolçusuyam mən.
Yoxsula deyilən yoxun,
Kasıba atılan oxun,
Nə haramın, nə də çoxun
Azın yolçusuyam mən.
Yalanım yox, düzüm düzdü
Üzüm min yox, bircə üzdü
Özüm özdü, sözüm sözdü
Sözün yolçusuyam mən.
Vətən sarı
Qara dönsəm dağ başında
Əriyəydim vətən sarı.
Xəstə olsam, dizim üstə
Yeriyəydim vətən sarı.
Ağlayacam öz ahımla
Yaşayacam sabahımla
Cəsədimi öz ruhumla
Sürüyəydim vətən sarı.
Elnarə Nur, gəz bağları
Unutma gəl xoş çağları
Duman olsam, o dağları
Bürüyəydim vətən sarı.
Öyrət
Babam, ağı gərək deyil
Mənə Cəngi çalmaq öyrət.
Düşmənlərin bayrağını
Göydən yerə salmaq öyrət.
Külə dönüm ocağında
Hər küncündə, bucağında
Hey vətənin qucağında
Sonunadək qalmaq öyrət.
Türk yurdunda diz çök, əyil
Elnarə, həsrətlə yeyil
Torpağımı vermək deyil
Onu geri almaq öyrət.
Tanrıya möhtac
Bəlkə də istəyim, arzum, ümidim
Bir qoca nənənin bayatısında
Bir çoban babanın tütəyindədir.
Allahdan pay umub, ruzi gözləyən
Doğru yol axtarıb, düzü izləyən
Doğma balaların hey əzizləyən
Bir kasıb atanın diləyindədir.
Gözəldir həm yeri payızın, yazın
Hər şeydən tez küsüb, etdiyim nazın
Çəməndən gül yığan tənhaca qızın
Bəlkə də yığdığı çiçəyindədir.
Müqəddəs mənimçün torpağım, daşım
Vətənin yolunda qoyaram başım
Gözümdən hey axan o sevinc yaşım
Güllərin mehində, çisəyindədir.
Sevincin gölündə üzüb batsaq da
Hərdən qəm-qüssəni, dərdi atsaq da
Uca zirvələrə, kama çatsaq da
Əlimiz tanrının ətəyindədir.
Məni
Hüseyn Arifin “Məni “ rədifli şeirinə cavab
Bir sönmüş ocağam vətəndən ayrı
Öz doğma yurduma yetirin məni
Əzəldən sığındım ana torpağa
Bir də o dağlara gətirin məni.
Bu həsrət deyir ki, içindən yeyil
Ya məndən qaçginən, ya mənə əyil
Ölsəm də razıyam, qürbətdə deyil
İtirsəz vətəndə itirin məni
Elnarəni sızlar telə döndərib,
Coşan, haraylanan selə döndərib,
Heç zaman solmayan gülə döndərib
Bir qaya daşında bitirin məni.
Blogger ŞƏRHLƏRİ
Facebook ŞƏRHLƏRİ