Elçin Aslangil - BİZ MƏRMİLƏRİN ÖVLADLARIYIQ

biz mərmilərin övladlarıyıq
qəpiyi-qəpiyin üstünə qoyub boş mərmilər alardıq
yadındadırmı Allah?

bir parça yavan çörək tanrı idi
göz yaşlarımıza tanrı
sevməzdik "20 yanvarı", "xocalını"
paylaşardıq bir parça çörəklə göz yaşlarımızı
bələyi qara bağlı (Qarabağlı) qaçqın uşaqlarla...

ata iyi nədir bilmədik
yollara boylanıb atalarımızı
burnumuzda barut qoxusuyla gözlədik
ona görə də mərmiləri çox sevərdik
atalarımız mərmi idi Allah mərmi...

bilirsənmi? -
hərdən Allah da olmaq istəyirdik
vurma!- deyən uşaqların Allahı
bağışla
elə bilirdik ki
sən təkcə ölülərin Allahısan..
axı biz uşaqların nə günahı vardı?!

biz mərmilərin övladlarıyıq
qəpiyi-qəpiyin üstünə qoyub boş mərmilər alardıq
yadındadırmı Allah?

Share on Google Plus

"eqoist": Unknown

Siz də öz yazılarınızı azizalibeyli@gmail.com və turalnuriyev679@gmail.com e-poçt ünvanlarına göndərə bilərsiniz.